Skammtímaáhrif af samrunum og yfirtökum á íslenskum markaði

Útdráttur

Grein þessi fjallar um skammtímaviðbrögð hlutabréfamarkaðarins við tilkynningu á yfirtökum og samrunum í Kauphöll Íslands á tímabilinu 1996-2005. Niðurstöður erlendra rannsókna benda til þess að skammtímaáhrif á hlutabréfaverð þess fyrirtækis sem eftir stendur þegar yfirtaka eða samruni hefur átt sér stað séu almennt lítil og leiði jafnvel til lækkunar á hlutabréfaverði þess fyrirtækis. Undantekningin virðist vera dálítil hækkun þegar um er að ræða minni fyrirtæki. Rannsókn þessi leiðir í ljós að hlutabréfaverð á íslenskum markaði hækkar um tæp 7% þegar um meiriháttar yfirtöku eða samruna er að ræða en breytist ekki við minniháttar yfirtöku eða samruna.